1 Tawarikh

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Chapter 19

Hana padubna treb teuma óh lheuehnyan Nahas raja Amon meuninggai donya, dan Hanun aneuëk agam gobnyan teubaiát jeuet keuraja.
2 Laju geupeugah lé Nabi Daud, "Nahas na kheueh sahabat ulôn nyang seutia, jadi meunan cit sikeueb ulôn keu Hanun, aneuëk jihnyan." Lé sababnyan Nabi Daud laju geukirém utosan u nanggroe Amon mangat jijak peumangat até ateueh meuninggai ureuëng syiek gobnyan. Bak watée awaknyan ka trok u Amon,
3 lé peumimpén nanggroenyan geupeugah ubak Raja Hanun, "Bék kheueh na neupike lam até droeneueh hai Teungku bahwa Nabi Daud nyan geukirém utosan geuh keunoe geukeuneuk bri horeumat keu ureuëng syiek Teungku Amphon! Teuma gobnyan geukirém ureuëng geuhnyan keunoe na kheueh sibagoe mata-mata keu jijak seulidek nanggroe geutanyoe, mangat hase jireubot lé awaknyan!"
4 Ban jideungoe nariet peumimpén jih nyan, lé Raja Hanun laju geudroeb banmandum utosan Nabi Daud nyan, laju jicuko janggot awaknyan, jigunteng peukayan awaknyan sampoe ka paneuk tinggai éut punggong, dan óh lheuehnyan jiyuejak laju awaknyan.
5 Teuma awaknyan malée that-that meunyoe jiwoe, lé sababnyan awaknyan jijak laju u Yerikho. Bak watée hainyan jijak peugah ubak Nabi Daud, gobnyan geukirém peusan mangat utosan-utosan nyan tinggai mantong di Yerikho sampoe janggot awaknyan ka jitimoh lom teuma.
6 Dan Raja Hanun ngon ureuëng Amon nyang rakyat gobnyan barô kheueh jisada bahwa peue nyang ka jipeubuet nyan lé sababnyan Nabi Daud ka geumeumusoh ngon gobnyan. Kareunanyan awaknyan laju geukirém 34.000 kilogram pirak u daerah Mesopotamia Ateueh, meunan cit u Maakha dan Zoba di Siria mangat teusiwa 32.000 geuritan prang dan sipa-i meuguda. Dan teuka kheueh sipa-i raja Maakha deungon banmandum geuritan prang nyang ka teusiwa nyan dan jipeudong laju khimah rab ngon Medeba. Meunan cit deungon ureuëng Amon nyang teuka bansaboh nanggroe nyan keu jijak muprang.
8 Bak watée Nabi Daud geudeungoe hainyan, laju geukrah Yoab dan banmandum angkatan prang gobnyan jeuet jijaklawan musoh.
9 Di ureuëng Amon pi laju jiteubiet jijak ato baresan dibabah pintoe geureubang Raba, ma banda droe awaknyan, seudangkan raja-raja nyang ka trok keuneuk jijak tulông awaknyan, jiato teuma baresan jih didalam padang.
10 Yoab deuh jikalon bahwa gobnyan ka teuseupet lamkawan pasokan musoh dikeue dan dilikot. Lé sabab nyan gobnyan laju jipiléh tantra Israel nyang paleng gét mangat jipeuhadab keue deungon sipa-i Siria.
11 Nyang leubeh nibak nyang kana nyan tantra Israel geujok teuma keu Abisai adoe gobnyan, nyang jiato baresan nyang meuhadab keue deungon sipa-i Amon.
12 Yoab geupeugah ubak adoe geuh, "Meunyoe ulôn hana ék le lôn meuteun ateueh sipa-i Siria, beubagaih kheueh gata teuka tajak tulông ulôn. Seubalek jih, meunyoe gata hana ek le tameuhadab keu deungon sipa-i Amon, ulôn teuma lôn teuka lônjak tulông gata.
13 Tabah kheueh! Jak kheueh geutanyoe tajak muprang deungon beurani deumi bansa geutanyoe dan banda-banda Allah geutanyoe. Seumoga TUHAN geupeubuet peue nyang geukeuheundaki."
14 Yoab dan pasokan gobnyan geumaju laju u mideuen prang, akhéjih sipa-i Siria jiplueng.
15 Bak watée jikalon lé sipa-i Amon bahwa sipa-i Siria ka jipuplueng droe, awaknyan pih jiplueng nibak Abisai dan jisurot u dalam banda. Óh ka lheueh jiprang ureuëng Amon, Yoab laju geuwoe u Yerusalem.
16 Ureuëng Siria sada bahwa awaknyan ka jipeutaloe lé sipa-i Israel. Lé sababnyan awaknyan laju geuhôi sipa-i droe gobnyan nyang na di daerah siblaih u timu Krueng Efrat dan geuyue tantra gobnyan mangat jijakmuprang dimiyueb pimpénan Sobakh panglima angkatan prang Hadadezer raja Zoba.
17 Jideungoe hai nyang lagéenyan, Nabi Daud laju geupeusapat banmandum pasokan Israel, laju jijeumeurang u meurandeh Krueng Yordan dan jiato laju baresan gobnyan meuhadab keue deungon sipa-i Siria. Dan jimuprang kheueh awaknyan,
18 dan sipa-i Siria taloe sira jisurot kareuna jiheuntam lé tantra Israel. Nabi Daud dan pasokan gobnyan na geupeumaté 7.000 droe nyang mat keumudo geuritan prang dan 40.000 droe sipa-i nyang jak ngon gaki. Meunan cit deungon Sobakh panglima Siria nyan pih maté teupoh.
19 Bak watée raja-raja nyang jimat kuasa lé Hadadezer jikalon hainyan bahwa awaknyan ka jipeutaloe lé sipa-i Israel, awaknyan laju jilakée meudamé deungon Nabi Daud, dan taklok ubak gobnyan. Óh ka lheuehnyan lé ureuëng Siria hana jitem bantu le ureuëng Amon.