Ezra

Chapter: 1 2 3 4 5 6 7 8 9 10


-Reset+

Chapter 1

1 Nibak thon nyang keu phon lam keurajeuen Kores, raja Persia TUHAN laju geupeubuet peue nyang ka lheueh geupeugah ubak Nabi Yeremia. TUHAN geupeumangat até Kores mangat jitem peuteubit saboh peurintah nyang jeuet teubaca di bansaboh nanggroe. Asoe surat nyan na kheueh lagée nyoe:
2 "Nyoe kheueh titah Kores, raja di nanggroe Persia. TUHAN, Allah nyang mat kuasa di syeuruga ka geupeujeuet ulôn raja di bansaboh donya, dan ka geubri tugaih keu ulôn mangat jeuet lôn peudong Baét iébadat keu Gobnyan di Yerusalem di daerah Yehuda.
3 Seumoga TUHAN Po teu Allah geulindong gata banmandum nyang ka jeuet keu umat Gobnyan. Gata banmandum harôh tawoe u Yerusalem dan tapeudong lom Baét TUHAN, Allah Israel, Allah nyang tinggai di Yerusalem.
4 Meunyoe na sidroe lamkawan umat Gobnyan di teumpat nyang teuböih nyoe nyang peureulée bantuan mangat hase geuwoe, dan kawöm silingka jih nyan harôh teubri bantuan nyan. Awaknyan harôh geubri keu ureuëng nyang woe nyan pirak dan méuh, keubeukai nibak rot ueh raya, meunan cit deungon beulatang nyang peudieng barang, dan meunan cit deungon peuseumahan-peuseumahan keu Baét TUHAN di Yerusalem."
5 Óh lheuehnyan bubena ulée kawöm nibak sukée Yehuda dan Benyamin, bubena teungku imeum dan ureuëng-ureuëng Lewi, dan somantong ureuëng nyang até jih ka geupeugrak lé Po teu Allah, laju jimeukeumaih-keumaih keu jijakwoe u Yerusalem dan jipeudong lom Baét TUHAN.
6 Banmandum kawöm lingka gobnyan meusajan-sajan jibantu sira jijok peue mantong bantuan nyang hase jibri, miseu jih lagée peukakaih-peukakaih pirak dan méuh, beukai nibak rot ueh, beulatang teumpat peudieng barang, dan hareuta beunda nyang laén dan peuseumahan-peuseumahan keu Baét TUHAN.
7 Raja Kores geupeuteubiet laju cambông-cambông dan cawan-cawan nyang yohmasa ilée teupeuguna dalam Baét TUHAN di Yerusalem. Barang-barang nyan ka jiangkot lé Raja Nebukadnezar dan jikeubah didalam kuil-kuil dewa gobnyan keudroe.
8 Kores geuseurah urosan beunda-beunda nyan ubak Mitredat, ulée peumbeundaharaan keurajeuen. Óh lheueh nyan Mitredat laju geupeugöt saboh dafeutar keuhai barang-barang nyan keu Sesbazar, gubunur Yehuda.
9 Nyoe kheueh dafeutar barang-barang nyan:
10
11 Banmandum nyan na jeumeulah jih 5.400 boh cambông méuh dan pirak teutamah teuma deungon barang-barang nyang laén. Banmandum nyan geuba lé Sesbazar bakwatée gobnyan dan ureuëng-ureuëng nyang teuböih laén geubeurangkat di Babel u Yerusalem.