Niemaia

1 2 3 4 5 6 7 8 9 10 11 12 13


Chapter 9

Ena i ka ruasagavulu ka va ni siga ni ka vitu ni vula, era sa vakasoqoni vata mai na luvei Isireli me ra lolo, ka vakaisulu taga, ka boro dravusa na uludra.
2 O ira na Isireli dina era sa tawasei ira mai vei ira na vulagi, ka ra sa tucake ka vakatusa na nodra i valavala ca kei na nodra caka cala na nodra qase.
3 Era sa tucake ka wilika na vosa mai nai Vola ni Vunau i Jiova na nodra Kalou me dua nai ka va ni siga, ena dua tale nai ka va ni siga me ra vakatusa tiko kina na nodra i valavala ca ka lotu vei Jiova na nodra Kalou.
4 O Josua, o Bani, o Kadimeli, o Sebanaia, o Buni, Serebaia, o Bani kei Senani e ratou sa tucake ena yasana ni Livai ka tagi vakadomoilevu vua na Kalou o Jiova.
5 O ira na Livai, o Josua, o Kadimieli, o Bani, o Asabania, o Serebia, o Odaijia, o Sebania kei Pecaia, era sa tukuna, "Mo ni tucake ka vakacaucautaki Jiova na nomuni Kalou ka sega ni mudu! "Me vakalagilagi na yacamuni tabu, sa vakacerecerei ka cecere sara na nona sautu kei na Nona qoroi!
6 Sai kemuni na Kalou, o Ni sa bulia na lomalagi, na lomalagi ni lomalagi kei ira kece sa tiko kina, o vuravura kei na ka kece. Na wasawasa kei na ka kece sa tu kina, o Ni sa maroroi ira kecega, o ira nai taukei kei lomalagi era sa qaravi kemuni ka lotu vei kemuni.
7 "Sai kemuni na Kalou o Jiova o koya sa kacivi Eparama ka kauti koya tani mai Uri e Kalatia, ka solia vua na yaca Eparaama;
8 O ni sa raica na nona yalodina e Matamuni ka cakava na veiyalayalati vata kei koya me solia na noda vanua na Kenanaiti, na Itaiti, na Amoraiti, na Perisaiti, na Jepusaiti, Qiriqasaiti – me solia vei ira na nodra kawa, ni kemuni sa vakayacora ga na nomuni vosa, ni sa dodonu oi kemuni.
9 "O ni sa raica na nodra vakararawataki na neimami qase mai Ijipita, ka rogoca na nodra tagi mai na Wasawasa Damudamu.
10 O ni sa vakaraitaka na ka veivakurabuitaki vei Fero, kei ira kecega na tamata ni nona vanua. O ni sa kila ni ra sai valavala vakaviavialevu ka vakadokadoka vei ira na neimami, ka o ni sa cakava na yacamuni me Nomuni, me vaka ki na siga oqo.
11 O ni sa wasea rua na wasawasa e matadra, era sa lakova na wasawasa ena qele mamaca; o ira na nodra dauveivakalolomataki, o ni sa viritaka ki na wai titobu me vaka na vatu ki na loma ni wai.
12 O ni sa liutaki ira ena duru o ena siga kei na duru bukawaqa ena bogi, me soli vei ira na rarama ena gaunisala era sa muria tiko.
13 "O ni sa lako sobu mai ena Ulunivanua o Sainiai, ka vosa vei ira mai lomalagi, ka solia vei ira na lewa dina, nai vunau dina, nai lesilesi dina ka vinaka kei nai vakaro.
14 O ni sa vakaraitaka vei ira na Nomuni Siga ni Vakacecegu dina, ka vakarota vei ira na sala, nai lesilesi kei nai vunau, ena ligai Mosese na Nomuni tamata.
15 Ena nodra via kana, o ni sa solia na madrai mai lomalagi, ni ra sa via gunu, o ni sa vakadrodroya na wai mai na vatu ka tukuna vei ira, me ra lako ka taukena na vanua, o ni a bubului kina me soli vei ira.
16 "Ia, o ira kei ira na tamai keimami sa cakacaka vakadokadoka, era sa vakaukauwataka na domodra ka sega ni via rogoca na ka o ni sa vakarota.
17 Era sa bese ni vakarorogo, sa yali mai vei ira na Nomuni veivakurabuitaki o ni a cakava ena kedra maliwa, era sa vakaukauwataka ga na domodra, ena nodra talaidredre era sa digitaka ga e dua na nodra i liuliu me ra lesu tale ki na nodra vesuki, sai Kemuni na Kalou, sa vakarau tu me veivosoti, sa yalovinaka ka yalololoma sa berabera ni cudru ka sa sinai tu ena yalovinaka ka sa sega ni via biuti ira.
18 "E dina mada ga, era sa bulia na matakau vaka na bulumakau, era sa tukuna, 'Oqo na nomuni kalou sa kauti kemuni mai Ijipita,' ka ra sa cakava tiko na veika e veivotoki,
19 Io, ena Nomuni loloma vakavuqa, o ni sa sega ni biuti ira mai na vanua liwa, sa sega ni biuti ira na duru o ena siga me liutaki ira ena gaunisala: Na duru bukawaqa ena bogi me solia vei ira na rarama ena sala era sa lakova.
20 O ni sa solia talega vei ira na yalomuni vinaka me vakavulici ira, ka o ni sa sega talega ni bureitaka na mana mai na gusudra ka vakagunuvi ira ena wai me oti kina na nodra karamaca.
21 E vasagavulu na yabaki o ni sa maroroi ira tiko mai na vanua liwa, sa sega ni yali vei ira e dua na ka; sa sega ni kabasu na nodra i sulu, sa sega talega ni bota na yavadra.
22 "Ia o ni sa solia vei ira na veimatanitu kei na veivanua, o ni sa wasewasea na nodra veiyasana, era sa taukena na vanua o Sione, na vanua nei tui Esibone, kei na vanua nei Oki na tui Basani.
23 O ni sa vakalevutaka na luvedra me vaka na kalokalo ni lomalagi, ka kauti ira mai ki na vanua, o ni sa vosa kina vei ira na nodra qase. Me ra lakova yani ka taukena.
24 Era sa lako yani ka taukena na vanua; o ni sa vakamalumalumutaka e matadra nai taukei ni vanua, o ira na Kenanaiti ka soli ira ki na ligadra kei ira na kena tui kei ira na kena tamata, me ra cakava ga vei ira na veika era vinakata.
25 Era sa taura na veikoro kaukauwa kei na kena veivanua bulabula ka taukena na veika sa sinai kina na veika e daugadrevi, nai keli sa keli oti tu, na veiolive, na veivaini, na veikau vuata sa sinai ka levu, era sa kana ka marau ka levulevu. Era sa reki tiko vakalevu ena Nomuni yalovinaka.
26 " Ia, era sa talaidredre ga ka vuki tani mai vei kemuni, era sa biuta na Nomuni vunau e dakudra ka vakamatei ira na Nomuni parofita, o ira sa dusia tiko na nodra cala ka me ra lesu tale vei kemuni; era sa cakava tikoga na ka ni veivakacudrui.
27 O koya oqo, o Ni sa soli ira kina ena ligadra na kedra meca, era sa tabaki ira sobu, ia ena nodra veigauna dredre, ni ra sa tagi vei Kemuni, o Ni sa rogoca mai Lomalagi; ia me vaka na levu ni Nomuni yalololoma o Ni sa solia vei ira na dauniveisereki. Me ra vakabula ira mai na ligadra na kedra meca.
28 "Ia, ni ra sa kune vakacegu tiko, era sa tekivu tale me caka ca e Matamuni, o koya oqo o Ni sa biuti ira kina ena ligadra na kedra meca. Era sa lewai mai vei ira; io, ni ra sa lesu mai ka tagi yani vei Kemuni, o Ni sa rogoca mai lomalagi, ka sa levu na gauna o Ni sa vakabulai ira ga ena vuku ni Nomuni yalololoma,
29 O Ni sa vakadinadinataka vei ira, ni oi Kemuni ga sa na rawa ni kauti ira lesu tale mai ki na Nomuni vunau. Io, era sa dokadoka mai ka sega ni via rogoca na Nomuni vakaro, era sai valavala ca mai na Nomuni lewa, 'O koya kevaka sa dua e muria sa na bula kina,' era sa kuretaka na tabadra, ka vakaukauwataka na domodra ka bese ni vakarorogo.
30 Sa levu na veiyabaki o ni sa vosoti ira tikoga ka vakadinadinataka tiko na nodra talaidredre ena Yalomuni sa tiko vei ira na Nomuni parofita. Ia, era sa sega ga ni via vakarorogo; o koya oqo era sa soli kina ki na ligadra na tamata ena vanua.
31 Ia, oi Kemuni ena Nomuni yalololoma levu o Ni sa sega ni vakarusai ira se biuti ira; ni kemuni na Kalou sa sinai ena yalovinaka kei na yalololoma.
32 "O koya oqo, na neimami Kalou, na Kalou cecere, na Kalou qaqa, ka sega ni vakamacalataki rawa na Nomuni vinaka, o Ni sa maroroya na veiyalayalati kei na yalololoma; Mo Ni kua ni raica me ka lailai na vei leqa kece sa tarai keimami, na neimami tui, na neimami turaga, na neimami bete, na neimami parofita, na tamai keimami kei ira kecega na Nomuni tamata, mai na nodra veisiga na tui Siria me yacova na siga oqo.
33 E dina, o Ni sa dodonu ena ka kecega sa tarai keimami tiko; o Ni sa cakacaka ga vakayalodina, ia, Oi keimami sa dau caka ca ga.
34 Sa sega vei ira na neimami tui, se o ira na turaga, se o ira na bete, se o ira na tamai keimami sa maroroya na Nomuni lesilesi o Ni sa vakadinadinataka tiko ena vukudra.
35 Era sa sega ni qaravi Kemuni ena nodra matanitu, se, ena veika vivinaka, o Ni sa cakava vei ira, se ena veivanua bulabula ka levu o ni sa vakarautaka e matadra; era sa sega ni vuki tani mai na nodra caka ca.
36 "Keimami sa tu oqo, na dauveiqaravi e daidai, kei na vanua o Ni sa solia vei ira na neimami qase, me keimami kania na vuana kei na kena veika vivinaka, oqo keimami sa kena dauveiqaravi tiko kina!
37 Sa levu na ka sa nodra na tui, o Ni sa solia vei keimami, baleta na neimami valavala ca; era sa lewa vakaveitalia na yagoi keimami kei na neimami manumanu, ka keimami sa vakaloloma sara.
38 "Ena vuku ni ka kece oqo, keimami sa cakava e dua na veiyalayalati e dei ka volai; o ira nai liuliu, o ira na livai kei ira na bete era sa dregata."