Tagi

Chapter 5

I Jiova, mo ni nanuma na ka sa yacovi keimami; Mo ni raica, io, na neimami vakacacani!
2 Na neimami votavota sa soli vei ira na vulagi kei na neimami veivale sa soli vei ira na kai tani.
3 Keimami sa luveniyali kei ira na tinai keimami era sa yada.
4 Keimami sa sauma na wai keimami gunuva kei na neimami kau talega sa volitaki.
5 Keimami sa cemuri ka cakacaka tiko ka sega ni vakacegu.
6 Keimami sa solia na ligai keimami vei ira na kai Ijipita kei ira talega na kai Asiria, me keimami vakamamautaki kina ena madrai.
7 O ira na tamai keimami era sa i valavala ca, ka era sa yali tani, Keimami sa mai colata na kena ca.
8 Era sa mai lewai keimami na dauveiqaravi, Sa sega e tu me vakabulai keimami mai na ligadra.
9 Keimami rawata vakadredre na keimami madrai, Baleta nai seleiwau mai na vanua liwa.
10 Sa katakata na yagoi keimami me vaka na lovo, E baleta na tauvimate ni via kana.
11 E ra sa rawai vakaukauwa na yalewa ni Saioni, O ira na vada talega ni veikoro e Juta.
12 Era sa vakaliligi tu na turaga ena ligadra kei ira na qase era sa sega ni dokai.
13 O ira na cauravou era sa tala vatu kei ira na gonetagane era sa taceba ena cola kau.
14 O ira na qase, sa mai oti na nodra dau mai sotasota ena matamata ni koro, O ira talega na cauravou, sa mai oti na nodra dau mai qiriqiri.
15 Na reki ni yaloi keimami sa mai oti; Na neimami dau meke sa vuki me so mate.
16 Sa lutu tani mai ului Keimami nai sala ni veiliutaki, Na ca levu veikeimami ni keimami sai valavala ca!
17 Oqo na vuna, keimami sa yalolailai kina, ka sa malumu sobu na rai ni matai keimami;
18 Sa lala na ulunivanua o Saioni ka era lako tu kina vakaveitalia na fokisi.
19 Io, sai Kemuni Jiova, sa tudei ka sega ni mudu; Na Nomuni tikotiko vakaturaga sa ka mai na dua nai taba tamata kina dua tale nai tabatamata.
20 Ena cava o ni sa guilecavi keimami kina, ka biuti keimami vakadede kina?
21 Mo ni vakalesui keimami tale vei Kemuni, Jiova, keimami na qai vakatikori lesu tale; me vakavoui tale na neimami veisiga me vaka e liu,
22 Vakavo ga kevaka o ni sa besetaki keimami vakadua. Ka cudruvi keimami vaka ca sara!