Creation vs. Evolution


  • Na Kalou, e nai tekitekivu ni ka kecega, sa vakavuna na veilomalagi kei na vuravura. Vakatekivu 1:1
  • Na Kalou sa qai tukuna, "Me sa levu mai na wai, ka me levu talega mai na vei manumanu bula, me ra sa vuka mai na manumanu vuka e delai vuravura ka vukaca yani na veiyasana vakalomalagi." Vakatekivu 1:20
  • Na Kalou sa qai bulia na veimanumanu levu ni waitui kei na veika bula kecega era sinai tu mai na wailevu ena kena veimataqali, na vei manumanu kece vakatabana ena kena veimataqali. Na Kalou, ni sa raica oqo sa vinaka vua. Vakatekivu 1:21
  • Na Kalou sa qai tukuna, "O vuravura me kauta mai na veika bula me vaka na kena veimataqali na manumanu yavai va, na veimanumanu kece sa qasi voli, na veimanumanu kila ni veikau, o ira kece oqo kei na kena veimataqali," sa yaco me vakakina. Vakatekivu 1:24
  • Na Kalou sa tukuna, "Medatou bulia mada na tamata me vakataki kedatou, me rairai vakataki kedatou, me ra lewa na vei ika kecega mai wai, na veimanumanu vuka e macawa kei na manumanu kecega ni vanua kei na veika kecega sa qasi voli e delai vuravura." Vakatekivu 1:26
  • Na Kalou, sa qai bulia na tamata me vakataki Koya ga, e nai rairai ga e va-Kalou, na Kalou sa bulia kina na tamata, na tagane kei na yalewa sa bulia o Koya. Vakatekivu 1:27
  • Na Kalou o Jiova sa bulia na tamata mai na kuvu ni soso mai na qele ka solia nai cegu ni bula ki na ucuna; sa qai yaco me dua na ka bula na tamata. Vakatekivu 2:7
  • E ono na siga, o Jiova sa bulia kina na lomalagi kei na vuravura, na wasawasa kei na ka kece sa tu kina, sa vakacegu ena i ka vitu ni siga. o Jiova sa vakalouvinakataka na siga ni vakacegu ka doka. Lako Yani 20:11
  • "Ia oqo mo tarogi ira mada na manumanu kila, era na vakavulici iko; Kei ira na manumanu vuka, ia era na tukuna vei iko; Se vosa ki na vanua, ia ena vakavulici iko; Kei na ika ni waitui ena vakamacalataka vei iko. O cei vei ira oqori me sega ni kila Ni sa cakava na ka oqo na Liga i Jiova, Jope 12:7-9
  • Sa kurukuru vakurabui na Kalou e na Domona; Sa cakava na ka levu o Koya eda sa sega ni kila rawa. Jope 37:5
  • "Mo raica mada na beamoci, o koya Au a bulia vata kei iko; Sa daukana co me vaka na bulumakau. Mo raica mada, sa tiko e tolona na nona gumatua, Kei na nona kaukauwa sa tu e na ua ni ketena. Sa kureitaka na buina me vaka na sitari; Na dali ni sagana sa tobe vata. A suina sa vaka nai coka varasa, A suina sa vaka na uma kaukamea. Jope 40:15-18
  • Na vualiku kei na Ceva o Ni sa tauyavutaka; o Tepori kei Erimoni, e rau sa rekitaka na Yacamuni Same 89:12
  • Ni se bera ni toso mai na veiulunivanua Ni se bera ni buli na vuravura Mai na Sega ni mudu ki na sega ni mudu, O Ni sa bula, o Ni sa Kalou. Same 90:2
  • O Ni sa tala yani na Yalomuni, era sa buli; ka o Ni sa vakavouia nai rairai kei vuravura. Same 104:30
  • Me ra vakavinavinakataka na Yaca i Jiova, Ni sa vosa o Koya, sa buli na ka kecega. Same 148:5
  • Sa vosa vakaoqo na Kalou o Jiova, o Koya ka bulia na lomalagi ena ligana maqosa, ka tevuka yani na vuravura me ra bula mai na veika bula, ka solia nai cegu vei ira na lewe i vuravura, kei na yalona vei ira ga era lako voli kina: Aisea 42:5
  • Au bulia na rarama kei na butobuto talega, Au vakayacora na veisaututaki ka vakatubura na dausiga; Oi Au, o Jiova, sa cakava na ka kecega oqo.' Aisea 45:7
  • Au a bulia na vuravura, kei ira talega na tamata me ra tiko kina—na ligaqu— e dedeka tu na lomalagi, kei na kena vavakoso Au vakaroti ira tu. Aisea 45:12
  • Ni sa vosa vakaoqo o Jiova, ka bulia na lomalagi, sa Kalou o koya ka tauyavutaka na vuravura ni bulia, ka vakataudeitaka, e sega ni bulia me qai lala tu, e bulia me tawani, "Sai au o Jiova, ka sega e dua tale. Aisea 45:18
  • "Ka raica, au sa bulia na lomalagi vou kei na vuravura vou; na vuravura makawa ena sega ni nanumi tale. Aisea 65:17
  • Sa sega beka ni dua na tamada kecega? Sa sega beka ni dua na Kalou sa buli keda kece? Na cava na vuna sa rui levu kina na veivakaisini ka sa basuki kina na nodra veiyalayalati na tamada? Malakai 2:10
  • "Ia mai nai vakatekivu ni veibuli, a sa bulia na tagane kei na yalewa na Kalou. Marika 10:6
  • "Ka ena dua na veivakararawataki levu ena tarai vuravura ena gauna o ya, ka se sega ni bau yaco mada mai na gauna e a buli vuravura kina na Kalou, me yacova na gauna o ya, ka ena sega tale ni dua vaka o ya me na qai yaco. Marika 13:19
  • Sa buli na ka kecega mai vei Koya, ke sega o Koya sa sega na ka e buli me buli rawa. Joni 1:3
  • Ena sega ni dua na nodra i ulubale, ni Kalou sa vakaraitaka na Nona i valavala mai nai vakatekivu, ena veika e bulia kei na Nona kaukauwa va Kalou ena veika bula e raici rawa. O ira oqo era sa kila oti tu na Kalou, ka ra sega ni bau via vakarokorokotaki Koya me vaka ni sa Kalou, era sega ni via vakavinavinaka, na nodra vakasama era vakanananutaka tu ga na veika dukadukali, ka sa yaco kina me vakabutobutotaki ka lialia na nanuma ni lomadra. Era via vakaraitaka tiko ni ra tamata vuku, sa qai tukuni ira tikoga mai na levu ni nodra lialia, Ena nodra vakaisosomitaka na qaravi ni Kalou bula, ena nodra kauta mai na vatu kei na kau, me ra bulia kina na manumanu vuka, na manumanu yava i va, na manumanu qasi voli, kei na i vakatakarakara ni tamata. O koya oqo, na Kalou sa qai solia vei ira na yalo, me ra sega ni kila na vinaka kei na ca kei na nodra sa cakava ga na dodomo ca ni yalodra, me vaka na ka era sa vinakata, Era veisautaka na dina ni Kalou mai na ka lasulasu, era cuva ka qarava na ka sa buli, ka sa sega ni o Koya na Dauveibuli, o Koya sa dodonu me vakalagilagi ka sega ni mudu. Emeni. Roma 1:20-25
  • Na veika buli mai nai vakatekivu, era sa waraka tiko ka nanamaki ena gauna cava, mera na vakaraitaki ira kina na luve ni Kalou ena nodra bula. Na veika rarawa kei na dredre e yaco e sega ni nakiti me vaka kina mai nai vakatekivu, ia baleti koya ga e talairawarawa me nuitaka na ka o ya. Na veika buli taucoko ena yaco talega vei ira na veivakavoui vou mai na vei vakatotogani ena vuku ni talaidredre, mera na wasea vata talega kei ira na luve ni Kalou na galala kei na lagilagi ni veivakaiukuukutaki. Ni da sa kila o vuravura taucoko e vutugu ka kune rarawa tiko mai me yacova mai oqo. Roma 8:19-22
  • E sega ni buli na tagane me baleti koya na yalewa, ia na yalewa e buli me baleti koya sara ga na tagane. 1 Koronica 11:9
  • Oi keda eda sa cakacaka ni Ligana, eda sa buli vou vei Karisito me baleta na cakacaka vinaka, o koya sa vakarautaka oti tu mai e liu na Kalou meda na muria. Efeso 2:10
  • O Koya ga e bulia na ka kecega mai lomalagi kei na ka e tu e vuravura, na kena e laurai kei na kena e sega ni laurai, na veitikotiko vakaturaga na veimatanitu, o ira na lewa tu na butobuto kei na kaukauwa kecega. E bulia na ka kecega oqori o Koya, ka lewa talega. Kolosa 1:16
  • Dou qarauna de dua e mai veisautaki kemudou ena nona kila ka vakavuravura ena vosa vakavukuvukuya, ka sega ni yaga, e yavutaka tiko nona vosa ena vakasama vakatamata kei na i vakavuvuli vakavuravura, ka sega ni vaka nai vakavuvuli i Karisito. Kolosa 2:8
  • Ni dou sa daramaka nai sulu ni tamata vou, ka vakavoui tikoga ena nomudou veiwekani kei Koya, mo dou na vakaraitaka tiko kina na nona cakacaka na dauveibuli. Kolosa 3:10
  • Era sega ni taleitaka me yaco na vakawati, era tarova ka sega ni duavata ena kakana sa solia mai na Kalou, me laukana vei ira sa vakabauta me ra vakavinavinakataka kina na dina ni Kalou. 1 Timoci 4:3
  • "Oi Kemuni na Kalou, mai nai vakatekivu, o ni sa vakayavutaki vuravura, o lomalagi sa cakacaka ni ligamuni; Iperiu 1:10
  • Na vakabauta sa vakarairaitaki kina na veika eda sa nuitaka tiko, sa vakadinadinataka na veika sa sega ni kunei. Na vakabauta era sa rawata kina na rogorogo vinaka o ira na qase. Ena vakabauta eda sa kila kina ni sa buli na vuravura ena Vosa ni Kalou, na veika sa kune tu oqo, sa sega ni buli mai na veika sa tu oti. Iperiu 11:1-3
  • Mo dou kila tiko: ni ra na lako mai na dauveiveretaki ca ena i otioti ni gauna oqo, era na vakaivalavalataki ira ena nodra gagadre ca, Era dau tukuna, " e vei na vosa yalayala ni na lako mai? E ra sa mate yani na qase, e sega ni dua na veisau e yaco ka tekivu mai nai vakatekivu." Era sega ni vakasamataka: ni vosa ni Kalou e tekivu kina na lomalagi mai nai vakatekivu, ka tawasea talega na vanua mamaca mai na wai, ka sega ni yali na wai mai vuravura, E a vakarusai vuravura, ena kena luvuci ena waluvu mai na kaukauwa ni wai. 2 Pita 3:3-6
  • "Mo vola oqo vei koya nai talai ni soqosoqo lotu mai Leotisea, ka vaka, sa tukuna na veika oqo o koya na Emeni, na Yalodina ka Dau tukutuku Vakadodonu, ka Bula ni se bera ni buli na vuravura: Vakatakila 3:14
  • "Sa dodonu mo ni rokovi, na Kalou, me nomuni na dokai na rokovi kei na kaukauwa; ni sai Kemuni sa bulia na ka kecega, ena Nomuni lewa sa buli kina ka sa vakavotukana tu." Vakatakila 4:11
  • Ka bubului tiko vei Koya sa bula ka Sega ni mudu, o Koya ka bulia na lomalagi kei na ka kece sa tu kina, vaka talega kina e vuravura, kei na ka kece e tu e watui, ena vakayacori kecega na ka sa nakiti kina. Vakatakila 10:6
  • Au qai raica yani ni dua tale na agilosi sa vuka voli ena maliwa lala ni lomalagi, sa tiko vua nai tukutuku vinaka ka Sega ni mudu, me vunautaki vei ira sa tiko e vuravura – na veimatanitu, na veiyavusa, na duivosavosa, kei na tamata kecega – Sa kacivaka tiko mai vakadomoilevu, "Dou rerevaka na Kalou ka vakacaucautaki Koya, ni sa toro tiko mai na Nona gauna ni veilewai; mo dou dokai Koya sa bulia na lomalagi kei na vuravura, na wasawasa kei na vei waivure kecega." Vakatakila 14:6-7