Jesus, Son of God - The Trinity


  • Óh lheueh nyan Po teu Allah meufeureuman lom, "Jinoenyoe tanyoe tapeujeut manusia nyang teuma jeuet lagée geutanyoe dan saban lagée geutanyoe. Jihnyan teuma jikuasa ateueh mandum eungkot, mandum cicém, dan banmandum beulatang nyang laén, bah kheueh nyang seu-iet meunan cit nyang kleut, bah kheueh nyang rayeuk meunan cit nyang ubit."
    Keujadian 1:26
  • TUHAN Allah meufeureuman, "Jinoenyoe manusia ka jeuet lagée geutanyoe dan kana iéuleumé peungeutahuan keuhai nyang gét dan nyang jeuhet. Ngon lagée nyan peureulée that teutam bék jipajoh boh kayée nyang teubri udeb, mangat jihnyan hana udeb siumu masa."
    Keujadian 3:22
  • Syedara-syedara, ingat kheueh! Teuma TUHAN, dan TUHAN mantong Allah geutanyoe!
    Kitab Teu-Ulang 6:4
  • Gobnyan geumat peurintah sibagoe raja keuturonan Nabi Daud, keurajeuen gobnyan rayeuk lumpah na. Nanggroe gobnyan sabe damé seujahteura; peumeurintah gobnyan dasai jih nibak huköm dan keuadelan jinoe sampoe siumu masa. TUHAN Nyang Mahakuasa pasti geulaksana.
    Nabi Yesaya 9:6
  • He umat Ulôn, gata kheueh saksi-saksi Ulôn, gata Ulôn piléh jeuet keu hamba-hamba Lôn, mangat neuturi Ulôn dan peucaya ubak Ulôn, dan neupeu phom bahwa Ulôn kheueh Po teu Allah. Ulôn Po teu Allah Nyang Mahaesa, hana nyang laén sigohlom dan óh ka lheueh Ulôn.
    Nabi Yesaya 43:10
  • Nyoe kheueh feureuman TUHAN Nyang Mahakuasa, Raja dan peulindong Israel, "Ulôn Po teu Allah Nyang Mahaesa, nyang awai dan nyang akhé.
    Nabi Yesaya 44:6
  • Peurab kheueh beutoe bak Ulôn dan deungoe kheueh nyoe, phon yoh ilée Ulôn peugah haba troh trang; dan tutoe haba Lôn sabe Ulôn peujeuet bak keunyataan." Jinoenyoe TUHAN Po teu Allah geu kirém ulôn dan geubri bak ulôn kuasa keudroe.
    Nabi Yesaya 48:16
  • Kuasa TUHAN Nyang Mahamanyang na nibak ulôn; Gobnyan nyang piléh dan nyang kirém ulôn keu lôn jakba haba gét ubak ureuëng gasien dan peupuléh ureuëng nyang ka hanco até; keu lôn jakpeugah ubak ureuëng nyang teuteuen bahwa awaknyan deungon sigra teupeubeubaih, dan ubak ureuëng-ureuëng nyang na lam glab bahwa awaknyan laju teupeulheueh.
    Nabi Yesaya 61:1
  • Kheun raja, "Ulôn keuneuk peumaklum peue nyang ka geupeuteutab lé TUHAN. Geupeugah lé Gobnyan ubak ulôn, 'Gata aneuëk agam Lôn, nibak uroenyoe Ulôn jeuet keu Bapak gata.
    Zabur 2:7
  • Nibak Sion TUHAN geupeuluwah keurajeuen gata; dan meukuasa kheueh ateueh musoh-musoh gata!
    Zabur 110:1
  • "Sidroe aneuëk dara peurawan teuma mume dan jipeu lahé sidroe aneuëk agam. Aneuëk nyan teuma jiboh nan Imanuel." (Imanuel na kheueh basa Ibrani nyang makna jih. "Allah na meusajan geutanyoe".)
    Matius 1:23
  • Óh ka lheueh teupumanö, Isa laju geuteubiet lam Krueng nyan. Hana teusangka-sangka langét teuhah dan Isa laju geukalon Roh Allah geutron lagée cicém mirah pati u ateueh Gobnyan. Óh lheueh nyan teudeungoe su Allah nyang geupeugah, "Nyoe kheueh Aneuëk Ulôn nyang Ulôn gaséh. Jihnyoe keubiet lumpah that mangat até Lôn."
    Matius 3:16-17
  • Sabab nyan jak kheueh ubak mandum bansa nyang na ateueh donya, peujeuet kheueh awaknyan keumurit-murit Ulôn. Pumanö kheueh awaknyan deungon gata teuôh nan Bapak, Aneuëk, dan Roh Allah.
    Matius 28:19
  • Geujaweueb lé Isa, "Peurintah nyang phon, na kheueh: 'Deungoe kheueh, hei bansa Israel! Tuhan Po teu Allah geutanyoe, Tuhan nyan Esa.
    Markus 12:29
  • Dan gurée agama nyan laju jipeugah ubak Isa, "Paih that lagée neupeugah nyan Bapak Gurée! Keubiet beutôi peu nyang Bapak peugah nyan: Tuhan Allah Nyang Esa, dan hana le Allah nyang laén seulaén Allah Nyang Esa nyan.
    Markus 12:32
  • Geujaweueb lé malaikat nyan, "Roh Allah teuma teuka ubak gata, dan kuasa Allah teuma peunoh jiseuleubong ateueh gata. Nyang kheueh sabab jih aneuëk nyang teuma lahé nyan teupeugah Suci, Aneuëk Allah.
    Lukas 1:35
  • "Bapak," kheun Gobnyan, "Meunyoe jeuet, neupeujiôh kheueh nibak Ulôn peundeuritaan nyang harôh Ulôn rasanyoe. Teuma bék kheueh meunurot lakée Ulôn, teuma meunurot lakée Bapak mantong."
    Lukas 22:42
  • Nibak awaiphon, sigohlom donya teupeujeuet, Feureuman ka na. Feureuman nyan na meusajan Po teu Allah dan Feureuman nyan saban ngon Allah. Yoh awai kon Geuhnyan na meusajan ngon Allah. Banmandum geupeujeuet meulalu Gobnyan, dan nibak banmandum nyang na, hana meusapeue nyang geupeujeuet meunyoe hana meusajan Gobnyan.
    Yahya 1:1-3
  • Feureuman ka jeuet keu manusia, Gobnyan tinggai diteungoh-teungoh geutanyoe, dan tanyoe ka takalon keuagongan Gobnyan. Keuagongan nyan geuteurimong sibagoe aneuëk tunggai Bapak. Rot Gobnyan tanyoe takalon Allah dan geunaséh Gobnyan ateueh geutanyoe.
    Yahya 1:14
  • Hana nyang ka lheueh jikalon Allah, seulaén aneuëk tunggai Bapak, nyang saban ngon Bapak dan krab lumpah na nibak Gobnyan. Gobnyan kheueh nyang peugah Bapak ubak geutanyoe.
    Yahya 1:18
  • Sabab Allah nyan Roh, teuma ngon kuasa Roh Allah manusia hase jiseumah Bapak lagée toh Gobnyan na.
    Yahya 4:24
  • Deungon tutoe haba nyan ka jeuet keusabab nibak ureuëng Yahudi keuneuk jipoh maté Gobnyan. Awaknyan jipeubuet hai nyang lagée nyan, kon lé sabab Gobnyan geupeu beuáh peuratoran agama keuhai uroe Sabat, teuma lé sabab Gobnyan geupeugah bahwa Po teu Allah nyan Bapak Gobnyan; ngon lagée nyan Gobnyan ka geupeusa droe Geuh saban ngon Po teu Allah.
    Yahya 5:18
  • Nyang kheueh sabab jih Ulôn peugah bak gata, bahwa gata maté lam desya-desya gata. Dan keubiet gata teuma maté lam desya-desya gata, meunyoe hana gata patéh bahwa 'Ulôn kheueh Jihnyan nyang teupeugah ULÔN NA'."
    Yahya 8:24
  • Geujaweueb lé Isa, "Keubiet Ulôn peugah bak gata: sigohlom Nabi Ibrahim lahé, Ulôn ka na."
    Yahya 8:58
  • Ulôn ngon Bapak na kheueh sa."
    Yahya 10:30
  • Ureuëng Yahudi nyan jijaweueb, "Kon sabab buet-buet Droeneueh nyang gét nyan kamoe keuneuk geulawa Droeneueh ngon batée, teuma sabab Droeneueh neuhujat Allah. Droeneueh sidroe manusia, keuneuk neupeujeuet Droeneueh Allah."
    Yahya 10:33
  • Geujaweueb lé Isa, "Ulôn kheueh rot keu teuturi ubak Allah dan meuteumé udeb. Hana meusidroe pih nyang hase jijak ubak Bapak, meunyoe hana rot Ulôn.
    Yahya 14:6
  • Geujaweueb lé Isa, "Ka padubnyan treb Ulôn na meusajan gata, gohlom cit gata turi keu Ulôn hai Filipus? Ureuëng nyang ka jikalon Ulôn, ka jikalon Bapak. Pakriban gata tapeugah, 'Tunyok kheueh Bapak bak kamoe'? Filipus, peu kheueh hana gata patéh, bahwa Ulôn meusaboh ngon Bapak, dan Bapak meusaboh ngon Ulôn? Peue nyang Ulôn peugah bak gata, hana Ulôn peugah nibak droe Ulôn keudroe. Bapak nyang teutab na meusaboh ngon Ulôn, Gobnyan kheueh nyang peubuet banmandum nyan. Meuiman kheueh bak Ulôn, bahwa Ulôn meusaboh ngon Bapak dan Bapak meusaboh ngon Ulôn. Atawa sihana-hana jih, tapatéh kheueh sabab peue nyang ka Ulôn peubuet.
    Yahya 14:9-11
  • Ulôn teuma Lôn lakée bak Bapak, dan Gobnyan geubri keu gata nyang Tulông laén, nyang teuma tinggai meusajan gata keu siumu masa. Geuhnyan na kheueh Roh Allah nyang teuma peugah keuhai Po teu Allah nyan beuna. Donya hana hase jiteurimong Geuhnyan, sabab hana jikalon atawa hana jituri. Teuma gata taturi Geuhnyan, sabab Geuhnyan tinggai meusajan gata dan teuma meusaboh ngon gata.
    Yahya 14:16-17
  • Teuma Roh Allah, nyang tulông nyang teuma geu-utus lé Bapak ateueh nan Ulôn, Gobnyan kheueh nyang teuma peurunoe gata banmandum dan geupeuingat gata keu banmandum nyang ka lheueh Ulôn bri keu gata.
    Yahya 14:26
  • Gata ka tadeungoe Ulôn meututoe, 'Ulôn kujak, teuma Ulôn teuma kuriwang lom ubak gata'. Meunyoe gata tagaséh keu Ulôn, gata teuma tagalak watée Ulôn jak bak Bapak, sabab Bapak leubeh rayeuk nibak Ulôn.
    Yahya 14:28
  • Ulôn teuma lôn utus bak gata peunulông nyang asai jih nibak Bapak. Gobnyan kheueh Roh nyang geupeugah Roh nyang beuna keuhai Po teu Allah. Meunyoe Rohnyan teuka, Gobnyan geumeusaksi keuhai Ulôn.
    Yahya 15:26
  • Nyoe kheueh Udeb seujati dan keukai; mangat manusia jituri Bapak, sibagoe Allah nyang beutôi, dan jituri Isa nyang nyang geu-utus lé Bapak.
    Yahya 17:3
  • Ulôn ka Lôn bri bak awaknyan keumuliaan nyang Bapak bri keu Ulôn, mangat awaknyan jeuet keusaboh, saban cit lagée geutanyoe saboh; Ulôn ngon awaknyan, dan Bapak ngon Ulôn; mangat awaknyan keubiet-keubiet saboh. Teuma donya jiteupeue bahwa Bapak kheueh nyang utus Ulôn, dan bahwa Bapak neugaséh awaknyan lagée Bapak neugaséh Ulôn.
    Yahya 17:22-23
  • teuma seucara ilahi Gobnyan na kheueh Aneuëk Allah. Nyan ka deuh bukeuti ngon kuasa nyang luwabiasa meulalu Gobnyan geubeudôh nibak maté.
    Roma 1:4
  • Sabab Allah na kheueh sidroe. Gobnyan kheueh nyang peumungken ureuëng-ureuëng Yahudi jimeugét lom teuma ngon Allah sabab awaknyan meuiman. Dan Gobnyan kheueh teuma nyang peumungken bansa-bansa laén jimeugét lom teuma ngon Allah; nyan saban cit sabab awaknyan meuiman.
    Roma 3:30
  • Meunyoe Roh Allah, nyang peu-udeb Almaseh nibak maté, udeb lam tuboh gata, teuma Gobnyan nyang peu-udeb Almaseh nibak maté nyan, teuma geupeu udeb teuma tuboh gata nyang hase maté nyan. Gobnyan geupeubuet nyan ngon Roh Gobnyan nyang udeb lam tuboh gata.
    Roma 8:11
  • Sibeuna jih hainyan na kheueh lagée nyang teutuléh lam Alkitab, "Peue nyang hántom jingieng atawa jideungoe lé manusia, dan hántom teuma jiteubiet lam pikeran manusia, nyan kheueh nyang geukeubah lé Allah keu ureuëng-ureuëng nyang gaséh keu Gobnyan." Teuma Allah ka geupeugah nyan bak geutanyoe ngon peurantaraan Roh Gobnyan. Roh Allah nyan jiseulidek peue-peue mantong, sampoe ubak reuncana-reuncana Allah nyang paleng teusöm.
    1 Korintus 2:9-10
  • Peu kheueh Gata teupeu bahwa gatanyoe Baét Allah? Dan bahwa Roh Allah tinggai lam gata?
    1 Korintus 3:16
  • Teuma nibak geutanyoe, Allah na kheueh tunggai. Gobnyan kheueh Bapak nyang cebta peue-peue mantong. Keu Gobnyan kheueh tanyoe udeb. Dan Tuhan na kheueh tunggai, Gobnyan kheueh Isa Almaseh. Meulalu Gobnyan peue-peue mantong teucebta, dan sabab Gobnyan kheueh geutanyoe nyoe udeb.
    1 Korintus 8:6
  • Teuma, meunyoe ureuëng-ureuëng nyang jipimpén lé Roh Allah, hase jih na kheueh lagée nyoe: Awaknyan saléng na gaséh sayang, awaknyan sabe lam geumbira, até awaknyan teunang, awaknyan saba dan meubudho basa, awaknyan gét ateueh ureuëng laén dan awaknyan seutia, 23 awaknyan miyueb até, dan sabe hase jikuasa droe. Hana huköm agama nyang larang hai-hai nyang lagée nyan.
    Galatia 5:22-23
  • Ngon peurantaraan Almaseh, geutanyoe mandum -- bah kheueh ureuëng Yahudi meunan cit nyang bukon Yahudi -- lé Roh Allah nyang saboh, jeuet tapeurab ubak Bapak.
    Efesus 2:18
  • Teuma na saboh tuboh dan saboh Roh. Meunan cit gata teuhôi keu jeuet saboh harapan nyang sa. Teuma na sidroe Tuhan, saboh iman, saboh pumanö, dan sidroe Allah nyang jeuet keu Bapak banmandum manusia. Gobnyan kheueh Tuhan seumesta álam, nyang mubuet rot banmandum, dan meukuasa ateueh banmandum.
    Efesus 4:4-6
  • meuharab that seumoga Allah Bapak geutanyoe dan Tuhan Isa Almaseh geubri beureukat dan seujahteura ateueh gata.
    Filipi 1:2
  • Bah kheueh gata na jiwa lagée Isa Almaseh: Nibak dasai jih Gobnyan saban ngon Po teu Allah, teuma Gobnyan hana geurasa droe bahwa keuadaan geuh nyang ilahi nyan meuseuti geupeuteun. Nyang sibeuna jih, Gobnyan geupeulheuh banmandum nyan laju jeuet keusaban lagée sidroe namiet. Gobnyan jeuet lagée sidroe manusia, dan leumah udeb geuh lagée sidroe manusia. Gobnyan geupeumiyueb droe, dan udeb ngon taát ubak Allah trok án maté -- na kheueh maté teusaleb.
    Filipi 2:5-8
  • Almaseh na kheueh gamba nyang nyata nibak droe Allah nyang hana leumah teukalon; Almaseh na kheueh aneuëk nyang tuha, leubeh peunteng nibak banmandum nyang geucebta.6 Sabab meulalu Gobnyan kheueh Allah geucebta peue-peue mantong nyang na lam syeuruga dan nyang na ateueh rhung bumoe, peue-peue mantong nyang deuh teukalon dan nyang hana deuh teukalon, jitamong cit keunan mandum roh nyang meukuasa dan nyang mat peurintah. Bansigom donya nyoe geucebta rot lalu Almaseh dan keu Almaseh. Sigohlom na peue-peue mantong ateueh rhung donya nyoe, Almaseh ka leubeh ilée na. Dan lé sabab Gobnyan kheueh teuma peue-peue mantong na nibak teumpat jih maséng-maséng.
    Kolose 1:15-17
  • Sabab banmandum pribadi Allah na tinggai lam Almaseh, na kheueh nibak keumanusiaan Gobnyan.
    Kolose 2:9
  • Seumoga Tuhan nyang bimbeng gata leubeh tamuphom bahwa Allah geugaséh gata dan bahwa Almaseh geubri até gata nyang tabah.
    2 Tesalonika 3:5
  • Sabab, teuma na sidroe Allah, dan sidroe nyang jeuet peudamé Allah ngon manusia, na kheueh Isa Almaseh.
    1 Timotius 2:5
  • Allah geupeu seulamat geutanyoe dan geutawök geutanyoe mangat jeuet keu umat Gobnyan keudroe. Gobnyan geupeubuet lagée nyan kon dasai jih peue nyang ka tapeubuet, teuma reuncana Gobnyan dan rakhmat Gobnyan. Gobnyan geubri keugeutanyoe rahmat Gobnyan meulalu Isa Almaseh sigohlom donya nyoe geucebta.
    2 Timotius 1:9
  • Jinoenyoe geutanyoe teungoh tapreh-preh Uroe nyang taharab-harab nyan; nibak Uroe nyan donya teuma jikalon keuagongan Isa Almaseh, na kheueh Allah Maharayeuk dan Raja Peuseulamat tanyoe.
    Titus 2:13
  • Gobnyan kheueh nyang peuteubiet keu agongan Allah nyang paleng meusyeuhu; Gobnyan kheueh gamba nyang paleng nyata nibak droe Allah keudroe. Gobnyan kheueh teuma nyang peulara alam nyoe sampoereuna deungon feureuman Geuh nyang paleng meukuasa. Óh ka lheueh Gobnyan teupeumungken manusia keuteupeubeubaih nibak desya-desya awaknyan keudroe, Gobnyan geuduek bak tahta peumeurintah nyang na lam syeuruga meusajan-sajan ngon Allah, Peunguasa nyang paleng manyang.
    Ibrani 1:3
  • Teuma ubak Aneuëk nyan Allah meufeureuman, "Takhta Droeneueh, ya Allah, teuma keukai siumu masa! Peumeurintah Droeneueh na kheueh peumeurintah nyang ade.
    Ibrani 1:8
  • peuteuk lom darah Almaseh! Meulalu Roh nyang keukai, Almaseh geupeu seumah droe Geuh keudroe ubak Po teu Allah sibagoe keureubeuen nyang sampoereuna. Darah Gobnyan teupeugleh até nurani geutanyoe nibak upacara agama nyang hana meuguna, mangat geutanyoe hase tapeutimang Allah nyang udeb.
    Ibrani 9:14
  • Isa Almaseh teutab saban, bah kheueh yoh masa ilée, jinoe, dan trok siumu masa.
    Ibrani 13:8
  • Syedara-syedara nyang umat piléhan Allah, nyang na bansaboh daerah Pontus, Galatia, Kapadokia, Asia dan Bitinia! Ulôn, Petrus, rasui Isa Almaseh, meuharab seumoga Po teu Allah geubri beureukat dan seujahteura ateueh gata ngon meulimpah-limpah. Gata teupiléh jeuet keu umat Allah nyang sisuai ngon reuncana Allah Bapak. Dan Roh Allah ka geupeujeuet gata keu umat nyang suci, khusos keu Po teu Allah, mangat gata taát ubak Isa Almaseh dan geupeu suci ngon darah Gobnyan.
    1 Petrus 1:1-2
  • Peue nyang ka kamoe ngieng dan kamoe deungoe, nyan cit teuma nyang kamoe peutrok ubak gata, mangat gata meusajan ngon kamoe tarasa udeb meusaboh ngon Bapak dan ngon Aneuëk Gobnyan Isa Almaseh.
    1 Yahya 1:3
  • Na lhée droe saksi: Roh Allah, ié ngon darah -- ban lhée nyan jimeusaksi nyang saban.
    1 Yahya 5:7-8
  • Tanyoe tateupeue bahwa Aneuëk Allah ka teuka dan ka geubri peungeurtian keugeutanyoe, mangat tanyoe taturi ubak Allah nyang beutôi. Tanyoe udeb meusaboh ngon Allah nyang beutôi dan udeb meusaboh ngon Aneuëk Gobnyan Isa Almaseh. Nyoe kheueh Allah nyang beutôi, dan nyoe kheueh udeb seujati nyang keukai.
    1 Yahya 5:20
  • "Ulôn kheueh nyang awai dan nyang akhé," feureuman Tuhan Allah, nyang na, nyang ka na, dan nyang na siumu masa, Nyang Mahakuasa.
    Wahyu 1:8