Prayer


  • Ulôn jikeulileng lé bahya mawôt dan teugeunang lé ié raya keubinasaan. Ulôn jikeulileng lé bahya mawôt, jeunieb mawôt meulinteung dikeue ulôn. Lam keuadaan ulôn teukeupong lôn meulakée ubak TUHAN, ulôn kliek ubak Allah ulôn lôn lakée tulông. Di Baét Gobnyan TUHAN geudeungoe su ulôn dan geupeutrok nyang ulôn lakée. 2 Samuel 22:5-7
  • Neudeungoe kheueh meulakée ulôn dan tulông kheueh ulôn, ya Raja ulôn dan Allah ulôn. Zabur 5:3
  • Pujoe kheueh Gobnyan, hai ureuëng-ureuëng taqwa! Peu agong kheueh Gobnyan, hai banmandum keuturonan Nabi Yakub! Sujut kheueh ubak Gobnyan, hai banmandum keuturonan Israel! Zabur 22:24
  • Meulakée kheueh ubak Ulôn bak watée gata meukarat, teuma Ulôn kupeuleuh gata, dan gata teuma tapujoe Ulôn." Zabur 50:15
  • Teuma ulôn meulakée ubak Po teu Allah, TUHAN geupeuseulamat ulôn. Zabur 55:17
  • Gobnyan kheueh Allah nyang bri keu ulôn seulamat dan keuhoreumatan, Gobnyan kheueh peulindong lôn nyang bila lôn nyang teuga. Zabur 62:8
  • Zabur Nabi Daud, bak watée gobnyan mantong di padang pasi guron Yehuda. Zabur 63:1
  • Meunyoe ulôn galak lôn pike keu buet nyang jeuhet, pasti TUHAN hana geutem deungoe peue nyang ulôn peugah. Teuma Po teu Allah ka geudeungoe ulôn, Gobnyan that geupakoe peue nyang ulôn lakée. Zabur 66:18,19
  • meunyoe TUHAN ka geupeudong lom Sion, dan geubeudôh dalam keuagongan Gobnyan. Zabur 102:17
  • Teuma TUHAN geudeungoe cit apoh apah awaknyan, dan Gobnyan teutab geukalon sosah awaknyan. Deumi awaknyan Gobnyan teuingat keu janji nyang ka geupeugah dan geugaséh keu awaknyan sabab geunaséh Geuh nyang raya. Zabur 106:44, 45
  • Ulôn ku cinta TUHAN, sabab Gobnyan geudeungoe ulôn dan geupakoe peue nyang ulôn lakée. Gobnyan geudeungoe ulôn, pajan mantong ulôn meulakée ubak Gobnyan. Zabur 116:1,2
  • Mubahgia kheueh ureuëng nyang jiseutôt peurintah Gobnyan, dan deungon sigeunab até ji useuha jituri TUHAN. Zabur 119:2
  • Deungon sipeunoh até ulôn meu useuha lôn turi Droeneueh, dan bék neupeubiyeu ulôn nyoe meusimpang nibak peurintah Droeneueh. Zabur 119:10
  • Hai gata nyang tinggai di Yerusalem, gata hana tamo sabe. TUHAN na gaséh sayang, dan deungon bagaih geujaweueb gata meunyoe gata lakée tulông ubak Gobnyan. Nabi Yesaya 30:19
  • TUHAN, Po teu Allah Kudus Israel meufeureuman, "Tanyong kheueh ubak Ulôn keuhai masa ukeue gata. Teuma bék tatanyong keuhai aneuëk-aneuëk Ulôn, atawa tayue ubak Ulôn teupeugét sapeue-sapeue. Nabi Yesaya 45:11
  • Tawoe kheueh ubak TUHAN simantong na meuteumé; tahôi kheueh Gobnyan simantong Gobnyan rab. Nabi Yesaya 55:6
  • Hana nyang meudoá keu kamoe, atawa nyang lakée tulông ubak Droeneueh, sabab Droeneueh neusöm ruman Droeneueh nibak kamoe, dan neupeubiyeu kamoe jipeubinasa lé desya-desya kamoe. Nabi Yesaya 64:7
  • Sigohlom awaknyan jilakée, ka Ulôn jaweueb; sigohlom lheueh awaknyan meudoá, doá awaknyan ka Ulôn peukabui. Nabi Yesaya 65:24
  • Gata mita Ulôn dan meurumpok deungon Lôn, sabab gata mita deungon sipeunoh até. Nabi Yeremia 29:13
  • "Meulakée kheueh ubak Ulôn, teuma Ulôn Lôn seuôt; Lôn bri tée ubak gata hai-hai nyang ceudah dan nyang kagum nyang gohlom gata teupeue. Nabi Yeremia 33:3
  • Beudôh kheueh meulang-ulang simalam suntok keu takliek tarô asoe até gata ubak TUHAN. Lakée kheueh mangat Gobnyan na rasa gaséh sayang keu aneuëk-aneuëk gata nyang teungoh deuk dan pansan bak tieb-tieb rot ueh nyang meukilok. Peumo Ba-E 2:19
  • Bah kheueh geutanyoe tatilek udeb geutanyoe, dan tawoe bak TUHAN Allah di dalam syeuruga. Jak kheueh geutanyoe ta peuhah até dan meudoá, Peumo Ba-E 3:40, 41
  • TUHAN meufeureuman, "Teuma bak saát nyoe, tawoe kheueh ubak ulôn deungon sipeunoh até, sira puasa, meuratok dan mo ba-e. Joel 2:12
  • "Meunyoe gata nemeudoá, bék kheueh lagée ureuëng nyang galak meupura-pura. Awaknyan galak meudoá sira jidong nibak rumoh iébadat bak simpang rot mangat jikalon lé gob. Ingat kheueh, nyan kheueh upah nyang ka awaknyan teurimong. Matius 6:5
  • Teuma meunyoe gata meudoá, tamong kheueh lam bilék dan tatôb kheueh pintoe, dan meudoá kheueh ubak Bapak gata nyang hana leumah nyan. Teuma Bapak gata nyang ngieng buet gata nyang teusöm teuma geubri upah keu gata. Meunyoe gata meudoá, bék kheueh meutelée-telée lagée ureuëng nyang hana jituri Tuhan. Awaknyan jipike peue nyang jilakée nyan geuteurimong lé Tuhan sabab doá awaknyan nyang panyang nyan. Matius 6:6,7
  • "Lakée kheueh, gata teuma tateurimong. Mita kheueh, teuma gata meuteumé. Tok-tok kheueh, pintoe teuma jipeuhah keu gata. Matius 7:7
  • Teuma roh jeuhet nyang lagée nyoe, barô kheueh hase teu-use deungon doá dan puasa." Matius 17:21
  • "Beutateupeu kheueh: Peue nyang gata tham lam donya nyoe, nyan pih teu tham dalam syeuruga. Dan beutateupeu kheueh teuma: Meunyoe lamkawan gata di donya nyoe na dua droe ureuëng ka sipakat keuhai peue mantong dan neudoá teuma, doá gata nyan teuma geudeungoe lé Bapak Ulôn lam syeuruga. Sabab, dipat mantong na dua atawa lhée droe ureuëng meusapat kareuna Ulôn, Ulôn teutab na di teungoh-teungoh awaknyan." Matius 18:18, 19B, 20
  • "Nyang sikeubiet jih, geukheun lé Isa, meunyoe gata meuiman dan hana ragu-ragu, gata pih hase tapeubuet pakriban nyang ka Ulôn peubuet keu bak ara nyoe. Dan kon nyan mantong, teuma gata jeuet tapeugah ubak gunong nyoe, 'teubeuôt kheueh dan teuböh kheueh u dalam laôt': teuma hai nyan teujadi. Peue mantong nyang gata lakée lam doá gata, nyang gata lakée nyan teuma gata teurimong, asai gata meuiman." Matius 21:21B, 22
  • Óh lheueh nyan Isa geujak leubeh jiôh bacut treuk, laju Gobnyan teudugom bak tanoh sira geumeudoá. "Bapak," kheun Gobnyan, "Meunyoe jeuet, neupeujiôh kheueh nibak Ulôn bandum bala nyang harôh Ulôn rasa nyoe. Teuma bék kheueh teuseutôt keuheundak Ulôn, teuma meunurot keuheundak Bapak nyang teujadi." Matius 26:39
  • Sabab nyan ingat kheueh nyoe: Meunyoe gata meudoá dan gata lakée peue nyang keuneuk gata lakée, peucaya kheueh bahwa Allah ka geubri keu gata peue nyang gata lakée, teuma nyan gata tateurimong. Markus 11:24
  • Dan, Ulôn peugah ubak gata: Lakée kheueh, keu gata teuma teubri; mita kheueh, nyang gata mita teuma meuteumé; keutok kheueh, teuma pintoe jibuka keu gata. Sabab ureuëng nyang meulakée teuma jiteurimong; ureuëng nyang mita teuma jiteumé, dan ureuëng nyang keutok, pintoe teuma jibuka. Lukas 11:9, 10
  • "Simon, Simon, deungoe kheueh nyoe! Iblih ka teubri idhin keu jiujoe gatanyoe; lagée gandom teupeu aséng nibak kulét sampoe nyang gét teupeu aséng nibak nyang brok. 32 Teuma Ulôn ka Lôn meudoá keu gata, hei Simon, mangat iman gata bék cupa. Dan meunyoe gata katagisa ubak Ulôn, gata harôh tapeukong bubena syedara-syedara gata." Lukas 22:31,32
  • Dan peue mantong nyang gata lakée ateueh nan Ulôn, nyan teuma Ulôn peubuet keu gata, mangat Bapak jipeumulia rot Aneuëk. Peue mantong nyang gata lakée ateueh nan Ulôn, Ulôn peubuet." Yahya 14:13, 14
  • Meunyoe gata teutab meusaboh ngon Ulôn dan ajaran Ulôn tinggai lam até gata, lakée kheueh bak Bapak peue mantong nyang gata keuneuk lakée; nyang gata lakée nyan teuma geubri. Yahya 15:7
  • Bak uroe nyan, gata hana tanyong sapeue le ubak Ulôn. Neupatéh kheueh: Peue mantong nyang gata lakée ubak Bapak ateueh nan Ulôn, nyan teuma geubri keu gata. Sampoe bak saát nyoe gata gohlom talakée sapeue ateueh nan ulôn. Lakée kheueh, teuma gata tateurimong, mangat harok gata sampoereuna." Yahya 16:23B, 24
  • Gobnyan teutab meuiman dan hana was-was peue nyang ka geupeu janji lé Po teu Allah keu gobnyan. Dan iman gobnyan meutamah kong dan gobnyan sabe meudhike ubak Allah. Gobnyan peucaya that bahwa Allah hase geupeubuet peue nyang ka geupeu janji ubak gobnyan. 22 Nyang kheueh sabab jih Nabi Ibrahim geuteurimong lé Po teu Allah sibagoe ureuëng nyang peumangat até Gobnyan. Roma 4:20, 21
  • Meunan cit ngon Roh Allah teuka geujak tulông tanyoe meunyoe tanyoe leumoh. Sabab geutanyoe hana tateupeue pakriban nyang sibeuna jih tanyoe meudoá; Roh nyan keudroe meuhadab Allah keu jijak lakée keu geutanyoe ngon meucen nyang leupah lhok sampoe hana hase jipeugah. Ngon lagée nyan Po teu Allah, nyang geuteupeue asoe até manusia, muphom peue nyang jilakée lé Roh nyan; sabab Roh nyan jilakée ubak Allah keu umat Allah keudroe, dan saban ngon keuheundak Allah. 28 Tanyoe tateupeue bahwa Allah nyang atoe peue-peue mantong, sampoe jipeuhase nyang gét keu ureuëng-ureuëng nyang gaséh Gobnyan dan geuhôi jihnyan saban ngon reuncana Gobnyan. Roma 8:26,27
  • Ngon kuasa Allah nyang biet-biet jimubuet lam tuboh geutanyoe, Allah hase geupeubuet jiôh leubeh jai nibak peue nyang hase talakée atawa nyang ta pike. Efesus 3:20
  • Peubuet kheueh banmandum nyan sira meudoá keuteulakée tulông ubak Allah. Bak tieb-tieb keuseumpatan, meudoá kheueh lagée Roh Allah geupimpén gata. Bah kheueh gata sabe lam keuadaan waspada dan bék meunyeurah. Meudoá kheueh sabe keubanmandum umat Po teu Allah. Efesus 6:18
  • dan meudoá kheueh sabe. 1 Tesalonika 5:17
  • Ulôn meuharab mangat dipat mantong ureuëng agam meudoá ngon até nyang gleh, ngon hana rasa beungéh atawa meusiliseh waham. 1 Timotius 2:8
  • Sabab nyan, jak kheueh geutanyoe ngon biet-biet tajeuet tameuhadab ubak Po teu Allah nyang mat peurintah deungon jroh até. Allah teuma geugaséh geutanyoe dan geubri beureukat ubak geutanyoe mangat geutanyoe meuteumé sinulong paih óh trok bak watée jih. Ibrani 4:16
  • Deungon sabab keu siumu masa Isa hase geupeu seulamat ureuëng-ureuëng nyang jijak ubak Po teu Allah meulalu Gobnyan, sabab Gobnyan udeb siumu masa keu teupeutrok meulakée Gobnyan ubak Po teu Allah keu ureuëng-ureuëng nyan. Ibrani 7:25
  • Meunyoe tan iman, hana meusidroe pih nyang hase jipeugalak até Allah. Sabab ureuëng nyang teuka ubak Po teu Allah meuseuti jimeuiman ubak Allah bahwa Gobnyan na, dan bahwa Allah geubri balasan ubak ureuëng nyang mita Gobnyan. Ibrani 11:6
  • Teuma ureuëng nyang meulakée, harôh meuiman; ureuëng nyan hana jeuet waih-waih. Sabab ureuëng nyang waih-waih na kheueh lagée geulumbang lam laôt nyang jipôt lé angén keudeh keunoe. 7 Ureuëng nyang lagée nyan hana teutab pikeran jih; sapeue hana hase jicok keuputosan lam hai peue mantong nyang jipeubuet lé ureuëng lagée nyan. Sabab nyan, bék jimeuharab sapeue nibak Tuhan. Yakobus 1:6, 7
  • Peurab kheueh ubak Allah, dan Po teu Allah pi geupeurab ubak gata. Peugleh kheueh jaroe gata, he gata nyang meudesya! Dan peujeureunéh kheueh até gata, he gata nyang meucabeueng até! Yakobus 4:8
  • Dan peue nyang tanyoe lakée nibak Gobnyan, meuteumé, sabab geutanyoe taát ubak peue-peue nyang geupeurintah lé Gobnyan dan tapeubuet peue nyang teupeugalak até Gobnyan. 23 Nyang Gobnyan peurintah bak geutanyoe na kheueh: Tanyoe meuseuti tameuiman ubak Aneuëk Gobnyan, na kheueh Isa Almaseh, dan tanyoe bah kheueh saléng tameugaséh, lagée nyang ka geupeurintah lé Isa ubak geutanyoe. 1 Yahya 3:22
  • Dan tanyoe tajeuet meuhadab ubak Allah, sabab geutanyoe yakén Gobnyan geuteurimong doá tanyoe, meunyoe tanyoe lakée peue mantong nyang sisuai ngon peue nyang sisuai deungon keuheundak Gobnyan. Sabab tanyoe tateupeue bahwa Gobnyan geuteurimong doá tanyoe peue-peue mantong nyang ta lakée, ngon lagée nyan tanyoe pih tateupeue bahwa Gobnyan geubri keugeutanyoe peue mantong nyang tanyoe lakée. 1 Yahya 5:14,15